原文
借洋钱赎身初定议 买物事赌嘴早伤和
按：黄翠凤因要出局，慌忙吃毕夜饭，即喊小阿宝舀面水来，对镜捕面。罗子富问：“叫到后马路啥场花？”翠凤道：“原是钱公馆哉囗。俚哚是牌局，一去仔末就要我代碰和。我要无拨啥转局，一径碰下去勿许走。有辰光两三点钟坐来浪，厌气得来。”子富道：“厌气末就谢谢（要勿）去哉。”翠凤道：“叫局阿好勿去？倪无(女每)要说个。”子富道：“耐无(女每)阿敢来说耐？”翠凤道：“无(女每)末啥勿敢说，我一径勿曾做差啥事体，生来无(女每)勿说啥；倘然推扳仔一点点，倪个无(女每)肯罢哉！”说时，赵家(女每)取出出局衣裳。翠凤一面穿换，一面叮嘱子富道：“耐坐来浪，我去一歇歇就转来个。”又叮嘱金凤“（要勿）走开”；又令小阿宝喊珠凤也来陪坐。
然后，赵家(女每)提了琵琶及水烟筒袋前行，翠凤随着，下楼登轿，径至后马路钱公馆门前停下。望见客堂里灯烛辉煌，又听得高声豁拳，翠凤只道是酒局。及进去看时，席上只有杨柳堂、吕杰臣、陶云甫暨主人钱子刚四位，方知为碰和的便夜饭。
杨柳堂一见黄翠凤，嚷道：“来得正好，请耐吃两杯酒。”即取一鸡缸杯送到翠凤嘴边。翠凤侧首让过，道：“我勿来吃。”柳堂还要纠缠。翠凤不理，径去靠壁高椅坐下。钱子刚忙起身向柳堂道：“耐去豁拳，我来吃。”便接了那杯酒。柳堂归座与吕杰臣豁拳。
钱子刚执杯在手，告诉黄翠凤道：“倪四家头来里捉赢家，我一连输十拳哚，吃仔八杯，剩两杯勿曾吃。耐阿吃得落，替我代一杯，阿好？”翠凤听说，接来呷干，授还杯子，又说：“再有一杯去拿得来。”子刚道：“就剩一杯哉，让赵家(女每)代仔罢。”赵家(女每)向桌上取一杯来，也吃了。陶云甫怂恿杨柳堂道：“耐末也算得是谄头哉！一样一杯酒，钱老爷教俚代，耐看俚吃得阿要快。”黄翠凤乃道：“耐是会说得来，吃杯酒也要说多花闲话哚！一样是朋友，耐帮仔杨老爷来说倪，赛过来里说钱老爷。让耐去说末哉，勿关倪事。”吕杰臣道：“故歇我输哉，耐也替我代一杯，让俚说勿出啥。”翠凤道：“吕老爷，勿然是代末哉，故歇拨俚说仔了，定归勿代。”杨柳堂催吕杰臣：“快点吃，吃好仔倪要碰和哉。”黄翠凤问：“阿曾碰歇？”钱子刚说：“四圈庄碰满哉，再有四圈。”吕杰臣吃完拳酒，因指陶云甫：“挨着耐捉赢家哉。”陶云甫遂与杨柳堂豁起拳来。
黄翠凤生恐代酒，假作随喜，避人左厢书房。只见书房中央几案纵横，筹牌错杂，四枝膻烛，却已吹灭，惟靠窗烟榻上烟灯甚明，随意坐在下手。随后钱子刚也到书房里，向上手躺着吸烟。翠凤乃问道：“倪无(女每)阿曾向耐借洋钱？”子刚道：“借末勿曾借，前日夜头我搭俚讲讲闲话，俚说故歇开消末大，洋钱无拨下来，匆过去，好像要搭我借。后来一泡仔讲别样事体，俚也就勿曾说起。”翠凤道：“倪无(女每)个心思重得野哚，耐倒要当心点。前转耐去镶仔一对钏臂，俚搭我说：‘钱老爷一径无拨生意，倒勿晓得陆里来个多花洋钱？’我说：‘客人个洋钱末，耐管俚陆里来个嗄！’俚说：‘倪无拨洋钱用，勿晓得洋钱才到仔陆里去哉。’我是气昏仔了，勿去说俚哉。耐想该号闲话俚是啥意思？”子刚道：“耐教我当心点，阿是当心俚借洋钱？”翠凤道：“俚要向耐借洋钱末，耐定归（要勿）借拨俚。随便啥物事，耐也（要勿）去搭我买。耐故歇就说是买拨我，隔两日终是俚哚个物事。俚哚一点点勿见好，倒好像耐洋钱多煞来浪，害俚哚眼热煞。耐勿买倒无啥。”子刚道：“俚倒一径搭耐蛮要好，故歇俚转差仔啥个念头，勿相信耐哉，阿对？”
翠凤道：“一点勿差。故歇是俚有心要难为我。前月底，有个客人动身，付下来一百洋钱局帐。俚有仔洋钱，十块廿块，才拨来姘头借得去。今朝要付裁缝帐，无拨哉，倒向我要洋钱。我说：‘我末啥场花有洋钱嗄？出局衣裳，生来要耐做个（口宛）。耐晓得今朝要付裁缝帐，为啥拨姘头借得去？’拨我反仔一泡，俚倒吓得勿响哉。”子刚道：“价末今朝阿曾拨点俚？”翠凤道：“我为仔第一转，绷绷俚场面，就罗个搭借仔十块洋钱拨俚。依仔俚心里，倒勿是要借罗个洋钱，要我来请耐向耐借，再要多借点，故末称心哉。”子刚道：“实概说，俚勿曾借着我个洋钱，陆里会称心嗄？倘然俚向我借，我倒也匆好回头俚。”翠凤道：“耐勿借也无啥（口宛），啥该应要借拔俚？耐说‘我一径无拨生意了，洋钱也无拨哉’，阿是说得蛮体面？到仔节浪，通共叫几个局，该应付几花洋钱，局帐清爽仔，俚阿好说耐啥邱话？”子刚道：“故是俚要恨煞哉。我说，俚不过要借洋钱，就少微借点拨俚，也有限煞个。再哝两节，等耐赎仔身末，好哉（口宛）。”翠凤道：“我匆要。耐同俚阿有啥讲究，定归要借拨俚，阿是真个洋钱忒多仔了？就算耐洋钱多，等我赎仔身借拨我末哉（口宛）。”子刚道：“故歇耐阿想赎身？”翠凤连忙摇手，叫他莫说；再回头向外窥觑，却正见一个人影影绰绰站在碧纱屏风前，急问：“啥人嗄？”那人见唤，拍手大笑而出。原来是吕杰臣。
钱子刚丢下烟枪起坐，笑道：“耐来里吓人！”吕杰臣道：“我是来里捉奸！耐哚两家头阿要面孔？就是要偷局末，也好等倪客人散仔，舒舒齐齐去上末哉（口宛），啥一歇歇也等勿得嗄！”黄翠凤咕噜道：“狗嘴里阿会生出象牙来！”
吕杰臣再要回言，被钱子刚拉至客堂归席。杨柳堂道：“倪输仔拳，酒也无人代，耐主人家倒寻开心去哉。”陶云甫道：“故歇让耐去开心晚歇碰和末抵桩多输点。”钱子刚并不置辨，只问拳酒如何。四人复哄饮一回，始用晚饭。饭后，同至书房点烛碰和。钱子刚因吸烟过瘾，倩黄翠凤代碰。
翠凤碰过两圈，赢了许多，愈党高兴，乃喊赵家(女每)来附耳叮嘱些说话。赵家(女每)领会，独自踅回家中，径上楼寻罗子富。不料子富竟不在房，只有黄珠凤垂头伏桌打瞌铣。赵家(女每)拎起珠凤耳朵，问：“罗老爷呢？”珠凤醒而茫然，对答不出；连问几遍，方说道：“罗老爷去哉呀。”赵家(女每)问：“陆里去嗄？”珠凤道：“勿晓得口宛。”
赵家(女每)发怒，将指头照珠凤太阳里戳了一下，又下楼至小房间问黄二姐。黄二姐告诉道：“罗老爷末拨朋友请到吴雪香搭吃酒去哉。耐去措大先生说，早点转来去转局。”赵家(女每)道：“价末等罗老爷票头来仔，我带得去罢。故歇俚也匆肯转来（口宛）。”黄二姐应承了。等够多时，才接到罗子富局票，果然是叫到东合兴里吴雪香家的。
赵家(女每)手执票头，重往后马路钱公馆来。一进门口，见左厢书房里黑——地并无灯光，知道碰和已毕，客人已散，即转身进右厢内室，见了钱子刚的正妻，免不得叫声“太太”。那钱太太倒眉花眼笑说道：“阿是按先生转去？先生来哚楼浪，耐就该搭等一歇末哉。”赵家(女每)只得坐下，却慢慢说出要去转局。钱太太道：“先生有转局末，早点去罢，晚仔勿局个。耐到楼梯下头去喊一声囗。”
赵家(女每)急至后半间，仰首扬声叫“大先生”，楼上不见答应；又连叫两声，说：“要转局去呀。”仍是寂然毫无声息。钱太太又叫住道：“（要勿）喊哉，先生听见个哉。”赵家(女每)没法，仍出前半间陪钱太太对坐闲话。
一会儿，听得黄翠凤脚声下楼，赵家(女每)忙取琵琶及水烟筒袋上前相迎。翠凤盛气嗔道：“啥要紧嗄，（口英）（口皇）（口英）（口皇）勿清爽！”钱太太含笑分解道：“俚末也算勿差，为仔票头来仔歇哉，常恐忒晚仔勿局，喊耐早点去。”翠凤不好多言，和钱太太立谈两句，道谢辞行。钱太太直送至客堂前，看着翠凤上轿方回。
赵家(女每)跟在轿后，径往东合兴里吴雪香家，搀了翠凤到台面上，只见客人、倌人、娘姨、大姐早挤得密层层没些空隙。罗子富座后紧靠妆台，赵家(女每)挤不进去。适罗子富与王莲生并坐。王莲生叫的局乃是张蕙贞，见了黄翠凤，即挪过自己坐的凳子，招呼道：“翠凤阿哥，该搭来囗。”又招呼赵家(女每)，觉得着实殷勤，异常亲密。黄翠凤见张蕙贞金珠首饰奕奕有光，知道是新办的，因携着手看了看，道：“故歇名字戒指也老样式哉。”张蕙贞见黄翠凤头上插着一对翡翠双莲蓬，也要索观。黄翠凤拔下一只授与张蕙贞，蕙贞道：“绿头倒无啥。”不料王莲生以下即系主人葛仲英坐位，背后吴雪香听得张蕙贞赞好，便伸过头来一看，问黄翠凤：“几花洋钱买个？”翠凤说是“八块”。吴雪香忙向自己头上拔下一只，将来比试。张蕙贞见是全绿的，乃道：“也无啥。”吴雪香艴然道：“也无哟我一对四十块洋钱哚呀，阿是也无啥！”黄翠凤听说，从吴雪香手里接来估量一回，问道：“阿是耐自家买个嗄？”吴雪香道：“买是客人去买得来个，来里城隍庙茶会浪。俚哚才说勿贵，珠宝店里陆里肯嗄！”张蕙贞道：“倪是倒也看匆出。拿俚一对来比仔末，好像好点。”吴雪香道：“翡翠个物事难讲究哚，少做好一点就难得看见哉。我一对莲蓬，随便啥物事总比匆过俚。四十块洋钱，是实概模样呀。”
黄翠凤微笑不言，将莲蓬授还吴雪香。张蕙贞也将莲蓬授还黄翠凤。葛仲英正在打庄，约略听得吴雪香说话，不甚清楚；及三拳豁毕，即回头问吴雪香：“啥物事要四十块洋钱？”吴雪香遂将莲蓬授与葛仲英，仲英道：“耐上仔当哉，陆里有四十块洋钱嗄！买起来不过十块光景。”吴雪香道：“耐末晓得啥嗄！自家勿识货，再要批-，十块光景耐去买哉囗！”罗子富道：“拿得来我来看。”擘手接过莲蓬来。黄翠凤道：“耐也是匆识货个末，看啥嗄？”罗子富大笑道：“我真个也匆识货。”遂又将莲蓬传与王莲生。莲生向张蕙贞道：“比仔耐头浪一对好多花哉。”张蕙贞道：“故是自然。我一对阿好比嗄！”吴雪香接嘴道：“耐也有来浪，让我看阿好。”张蕙贞道：“我一对是一点勿好个，难再要去买一对。”说着，也拔下一只，授与吴雪香。雪香问：“几块洋钱？”张蕙贞笑道：“耐一对末，我要买十对哚。”吴雪香道：“四块洋钱，生来无拨啥好物事买哉。耐再要买，情愿价钱大点。价钱大仔物事总好哉（口宛）。”张蕙贞笑着，随向王莲生手里取那莲蓬和吴雪香更正。
当时临到罗子富摆庄，“五魁”、“对手”之声隆隆然如春霆震耳，才把吴雪香莲蓬议论剪断不提。
原来这一席除罗子富、王莲生以外，都是钱庄朋友。只为葛仲英同吴雪香恩爱缠绵，意不在酒，大家争要凑趣，不肯放量，勉强把罗子富的庄打完，就草草终席而散。
吴雪香等客人散尽了，重复和葛仲英不依，道：“我来里说闲话末，耐该应也帮我说句把，故末算得耐要好；耐倒来扳我个差头，阿要诧异！我说一对莲蓬要四十块洋钱哚，真个四十块洋钱，勿是我骗耐（口宛）。耐勿相信，去问小妹姐好哉。耐一歇极得来，常恐倪要耐拿出四十块洋钱来，连忙说十块。就是十块末，阿是耐搭我去买得来嗄？耐就搭我买仔一只洋铜钏臂连一只表，也说是三十几块哚；说到我自家个物事末就匆稀奇哉。耐心里只道仔我是蹩脚倌人，陆里买得起四十块洋钱莲蓬，只好拿洋铜钟臂来当仔金钏臂带带个哉，阿是？”一顿夹七夹八的胡话，倒说得仲英好笑起来，道：“故末阿有啥要紧嗄？就是四十块末也匆关我事。”雪香道：“价末耐说啥十块嗄？耐说是十块末，耐去照式照样买得来，我再要买一副头面囗。洋钱我自家出末哉，耐去搭我买！”仲英笑道：“（要勿）说哉，我去买末哉。”雪香道：“耐是来里搭浆（口宛），我明朝就要个囗。”仲英道：“我今朝夜头去买，阿好？”雪香道：“好个，耐去囗。”
仲英真个取马褂来著，恰遇小妹姐进房，慌道：“二少爷做啥？”正是拦阻，雪香丢个眼色，不使上前。仲英套上扳指，挂上表袋，手执折扇，笑向雪香道：“我去哉。”雪香一把拉住，问：“耐到陆里去？”仲英道：“耐教我买物事去（口宛）？”雪香道：“好个，我搭耐一淘去。’携了仲英的手便走。踅至帘前，仲英立定不行，雪香尽力要拉出门外去。小妹姐在后拍手大笑道：“拨巡捕来拉得去仔末好哉！”客堂里外场不解何事，也来查问。小妹姐乃做好做歹劝进房里，仍替仲英宽去马褂。
雪香撅着嘴，坐在一傍，嘿然不语。仲英只是讪笑。小妹姐亦呵呵笑道：“两个小干仵并仔一堆末，成日个哭哭笑笑，也匆晓得为啥，阿要笑话！”仲英道：“对勿住，倒难为耐老太太讨气。”小妹姐道：“划一，我真个气煞来里。”说罢自去。
仲英踅至雪香面前，低声笑道：“耐阿听见，拨俚哚当笑话。一点无拨啥事体，瞎噪仔一泡，故末算啥囗？”雪香不禁“嗤”的笑道：“耐阿要再搭我强了？”仲英道：“好哉，耐便宜个哉。”雪香方欢好如初。
仲英听得外场关门声响，随取下表袋看时，已至一点多钟，说道：“天勿早哉，倪困罢。”雪香问：“阿要吃稀饭？”仲英说：“（要勿）吃。”雪香即喊小妹姐来收拾。小妹姐舀水倾盆，铺床叠被。
正在忙乱之际，忽然一个小大姐推进大门，跑至房里，赶着小妹姐叫一声“无(女每)”，便将袖子掩口要哭。小妹姐认得是外甥女，名叫阿巧，住在卫霞仙家的，急问他道：“耐故歇跑得来做啥？”那阿巧要说，却一时说不出口。